البرد زاد قساح، والشتا بدات كتخبط فالزاج ديال الطاكسي بحال يلا السما كترجم هاد البلاصة بالحجر. طارق مخبع مورا الكوفر ديال المرسيدس، كينهج، وعينيه مفيكسيين على داك الخيال الطويل اللي نزل من الكاط كاط الكحلة. الضواو القويين ديال الطوموبيل كانو ضاربين فظهر داك السيد، مخلين وجهو غارق فالظلام، ولكن الهيبة ديالو طغات على المكان. العصابة كلها، بذاك "الزعيم" ديالهم اللي كان قبل ثواني كيغوت وكيتفرعن، دابا واقفين بحال الفيران اللي شافو المش. السلاح هبط، والريوس حذرات، حتى من داك الدري اللي تهرس ليه نيفو كان شاد وجهو وساكت ما كيقدرش يخرج حتى أنين ديال الوجع. طارق، فديك اللحظة، كان عقلو كيضرب أخماس فأسداس. التدريب ديالو فالمعهد ديال الشرطة، الدروس ديال التكتيك، وكاع داكشي اللي قرا، كان كيقول ليه حاجة وحدة: "هرب أ طارق.. غطس فداك الواد، تخبع فالغابة، تسنى الصباح وجيب الدعم." الدماغ كيقول هرب، ولكن الدم الحامي ديالو، والكرامة ديالو كبوليسي، رفضات هاد الفكرة رفضا قاطعا. ما يمكنش يخلي هاد الراس المدبر اللي روع الشيافر ويتمتم العائلات يفلت فهاد الليلة. طارق زير على الفردي ديالو، خذا نفس عميق، وخرج من مورا الطاكسي بخطوات تقال، بحال شي واحد غادي لساحة الإعدام برجليه. "هز يديك الفوق! البوليس!" غوت طارق بصوت حاول يخليه يغلب على صوت الرعد. الفردي ديالو كان موجه نيشان لداك السيد الطويل. السيد ما تخلع، ما هرب، ما دار حتى حركة ديال المقاومة. بقا واقف فبلاصتو، الشتا كتنزل على الكابوط الكحل ديالو ديال الجلد كدير صوت خافت. دار بشوية جيهة طارق، ورفع يدو اللي شادة العكاز... الضو ضرب فداك الخاتم ديال النقرة، وبان النقش الغريب كيشعل. السيد حدر راسو شوية، وبدا كيضحك. ضحكة تقيلة، باردة، بحال شي موس كيتجر على الزاج. "البوليس؟" قال السيد بصوت خشن ومبحوح، فيه واحد النبرة ديال الاستهزاء اللي خلات طارق يحس بالصغر. "عمرني شفت شي بوليسي باغي يموت بوحدو فوسط هاد الخلا. سحابليك راسك بطل ديال شي فيلم أ ولدي؟ نتا راك غير بيدق صغير فواحد الرقعة اللي كبر من داك العقل الصغير ديالك." "قلت ليك هز يديك، ولا غادي نفرغ فهاد الراس اللي كتهضر بيه!" طارق قسح الهضرة، وتقدم خطوة لقدام، صبعو على الزناد مزير. السيد مول الخاتم تنهد بحال يلا طارق غير كيبرزطو. دور وجهو جيهة "الزعيم" ديال العصابة وقال ليه بنبرة ديال الأمر: "حيدو عليا هاد الحشرة من الطريق، وجيبو ليا داك الكارني، راه ضيعتو ليا الوقت بزاف." العصابة، اللي كانت خايفة من البوص ديالها كثر من القرطاس ديال طارق، تحركات فدقة وحدة. طارق ما تسناهمش. ضرب القرطاسة الأولى فكتاف واحد من دوك اللي هازين الهراوات، طاح كيغوت. الزعيم هز الفردي ديالو وبغا ييري، ولكن طارق كان خفيف، تلاح فوق الكابو ديال الطاكسي، زلق مع الشتا، وضرب الزعيم بركلة طايرة لوجهو خلاتو يطير اللور ويطيح فوسط الغيس. الدري الصغير فالعصابة بغا يغدرو من اللور بالموس، طارق دار عندو بالزربة، شد ليه يدو، لواها ليه حتى تسمعات الطرطيقة ديال العظم، وعطاه بونية لكرشو خلاتو يتقيا الدم. طارق فهاد اللحظات كان بحال شي وحش هايج، الأدرينالين طالع ليه للراس، والتدريب ديالو بان فكل حركة. طيح ثلاثة، وبقاو جوج. ظن راسو بلي قدر يسيطر على الوضع، ظن بلي هاد المواجهة غتكون فصالحو... ولكن هاد الغرور اللحظي هو اللي كان الثمن ديالو غالي. فالوقت اللي طارق كان كيتلفت باش يوجه السلاح للرابع، حس بشي حاجة قاصحة بحال الحديد نزلات على المعصم ديال يدو اللي شادة الفردي. الضربة كانت خيالية فالسرعة والقوة. طارق حس بالضو طفا ليه فعينيه، والعظم ديال يدو بحال يلا تفرتت. الفردي طاح فالعافية ديال الغيس، وطارق غوت غوتة مكتومة وتراجع اللور كيشد يدو. السيد مول الخاتم كان قدامو. تحرك من بلاصتو بواحد الخفة اللي ما كتوالمش الشيب اللي فلحيتو ولا العكاز اللي هاز. داك العكاز ما كانش غير عكاز ديال الشيوخ، كان سلاح من الخشب القاصح، مكولي بالنحاس من التحت. قبل ما طارق يستوعب الصدمة، مول الخاتم دور العكاز فيدو بحال شي سيف، وضرب طارق لركبتو. الضربة طرطقات المفصل، وطارق طاح على ركابيه فوسط الما والتراب، ما بقاش قادر يوقف. حاول طارق يدافع على راسو باليد اليسرى، صيفط بونية قاصحة جيهة وجه مول الخاتم، ولكن السيد تفاداها غير بميلة ديال الراس، وشد طارق من التوني الكحل ديالو، جرو عندو حتى تلاقاو عينيهم. طارق شاف فداك الوجه لأول مرة... وجه عامر بالتجاعيد، ولكن فيه واحد العينين كحلين ما فيهم حتى ذرة ديال الرحمة، عينين بحال ديال شي ذيب شارف. "الزعامة زوينة أ ولدي،" همس مول الخاتم فودن طارق، والريحة ديال السيكار الكوبي خارجة من فمو. "ولكن الزعامة بلا عقل، كاتجيب غير الموت المجاني. سحابليك هاد الكارنيات اللي كنجمعو فيهم غير كريديات ديال القهاوي؟ سحابليك هاد الشيافر كيموتو على قبل جوج دريال؟ نتا داخل لواحد البحر اللي ما كتعرفش حتى تعوم فيه." طارق تفل الدم اللي تجمع ففمو نيشان فكابوط السيد، وابتاسم ابتسامة ديال التحدي واخا الوجع قتلو: "غادي نطيحك أ ولد الحرام... واخا نموت اليوم، البوليس غيقلبو عليك حجر بحجر." مول الخاتم مسح الدم من كابوطو بكل برودة. طلع العكاز الفوق، ونزلو بكل ما عطاه الله ديال الجهد نيشان لراس طارق. الضربة كانت حاسمة. طارق حس بحال شي قنبلة تفرگعات وسط دماغو. الدنيا بدات كدور بيه، الصوت ديال الشتا والرعد بدا كيبعاد، والضو ديال الكاط كاط ولا غير خطوط مضببة. طاح على جنبو، الغيس دخل ليه لفمو ولعينيه، ولكن ما بقاش قادر يتحرك. الجسد ديالو استسلم، ولكن عقلو بقا شاعل لثواني قليلة. شاف مول الخاتم كيمشي جيهة الطابلو دبور ديال الطاكسي، كيهز الكارني الكحل. السيد حل الكارني، ضرب فيه طلة خفيفة، ومن بعد لاحو فالغيس حدا وجه طارق. "مزور..." قال مول الخاتم بصوت عامر بالغضب. "هاد الكلب بغا يصيدنا بكارني خاوي." دار جيهة رجالته اللي بداو كيوقفو وكيمسحو الدم من وجوههم، وغوت فيهم: "هزو هاد الزبل لوحوه فالكوفر ديال الكاط كاط! غادي نديه معايا. هادا ما غاديش يموت ساهل، خصني نعرف شكون صيفطو وشنو كيعرفو البوليس بالضبط. طفيو العوافي، وزيدو فهاداك الطاكسي للواد خليه يبان بحال شي حادثة." اخر حاجة عقل عليها طارق هي جوج ديال اليدين خشان كيهزوه من حوايجو كيجرجروه فوسط الغيس. الباب ديال الكوفر د الكاط كاط تحل، وتلاح لداخل بحال شي خنشة د البطاطا. الباب تضرب، والظلام طوى طارق فمرة، بينما الموطور ديال الكاط كاط زنگ وشد الطريق طالع فجبال تيشكا، غابر فوسط الضباب، وخالي وراه غير الدم، وكارني مزور غارق فالغيس.